سلمى صباحى تكشف السر وراء قضية التسويق الشبكي!
متابعة – هبة عراقي
في أول عودة لها للتواصل مع متابعيها عبر موقع التواصل الاجتماعي
الفيسبوك، كشفت سلمى صباحى ابنة مؤسس التيار الشعبي حمدين صباحى، السر وراء
قضية التسويق الشبكي المتهمة فيها، والمقدم ضدها 22 بلاغاً.
وكشفت سلمى في مقال لها كتبته في الساعات الأولى من فجر اليوم، بعنوان
(السر) أسرار أيام الحجز، وشكرت كل من ساندها وختمت بقولها “أحمدك يا رب”.
قام بمشاركه المقال 2,481شخص، وأبدى إعجابه بها 6,833 آخرين حتى لحظة إعداد
هذا التقرير،فيما توالت ردود الفعل على المقال مهنئين سلمى بعودتها
بالسلامة والإفراج عنها.
وقال سلمى عبر صفحتها على الفيسبوك “السر.. إني حسيت إن ربنا بيحبني قوي
ابتلاني ونصفني.. السر.. إني دقت جزء من الظلم اللي داقه أبويا.. السر..
إني كنت بشوف صمود أمي أيام وشهور لما كانوا بيعتقلوا أبويا.. السر .. إن
بعد 6 سنين جواز اكتشفت في “أشرف” حاجات جديدة واتأكد شعوري إنه هدية ربنا
ليا”.
وأضافت سلمى “وسطيهم وكبرت قدامهم دافعوا عني بقلب الأب ولما رجعت البيت
أخدوني في حضنهم وبكوا من فرحة رجوعي.. السر.. إن كل المحامين الكبار
الأعزاء أصدقاء أبويا واللي بيعتبروني زي بنتهم دافعوا عني متطوعين وبقلب
صادق جدًا.. السر.. إن المحامي المحترم خالد أبوبكر ظهر في حياتي فجأة ليلة
التحقيق سمع قصتي وطلب مني أعمل له توكيل عشان يقف جنبي تطوعًا منه
وماسابنيش لحظة”.
وتابعت “السر.. إن صحابي الجدعان “بنات ورجاله” كانوا واقفين طول الأيام في
النيابة وقدام القسم بس عشان يحسسوني إنهم جانبي.. السر.. إني اكتشفت عظمة
حب الناس ودعواتهم الصادقة كانت بتوصلني وأنا لوحدي في الحجز.. السر.. إن
ضباط قسم العجوزة كلهم باختلاف الرتب كانوا بيتعاملوا معايا “كإنسانة”..
السر.. إن ملازم أول أصغر مني بكام سنة من القسم قال لي: “لما كنت في ثانوي
كنت بتابعك في برنامج شبابيك وأحس إنك أختي أنا واثق إنك بريئة”.
واستطردت “السر.. إن رئيس ووكلاء نيابة العجوزة في منتهى الاحترام.. السر..
إن رئيس نيابة العجوزة رجل عنده ضمير مهني حقيقي بعد تحقيقات استمرت 3
أيام وبعد ما كتب مذكرة تفيد إني مجني عليا ولست مدانة جه القرار بالحبس
قال لي: “انا بعتذرلك”.. السر.. إني لما رجعت البيت كنت مشتاقة قوي لحضن
“حلم” بنتي ولما حضنتها لقيتها اتعلمت جملة جديدة “وحشتيني يا ماما” ،
مشيرة عرفت قيمة سريريها بعد 5 أيام من غير نوم، حيث نامت لمدة 6 ساعات،
موضحة: “لما صحيت لقيت 654 ميسد كول و76 رسالة بيباركولي”.
وأشارت سلمي “لقيت اسمي “ستاتس” على الفيس بوك وأكتر من 30 مقالا بأقلام
كبار الكتاب عني في الجرايد والافات التويتات بتدعمني.. السر.. إني حسيت
بوجع المظلومين.. السر.. ان اكتشفت ان الظلم بيقوي.. السر.. في سبحة
“الطاهر” عمر طاهر”.
وتابعت قمت بكتابة الاية الكريمة “لا إله إلا أنت سبحانك إني كنت من
الظالمين” على جدران الحجز ليقرأها أي مواطن يدخل الحجز.. مشيرة : السر..
إني لقيت الوقت اللي افتكرت فيه كل حاجة حلوة ربنا أكرمني بيها في حياتي
ولقيت نفسي محظوظة جدا بالأهل والأصحاب والأحبة..السر إن لما افتكروني دراع
أبويا عشان يلووه.. لاقوني ضهره المستقيم اللي مايتحنيش” .
وأردفت سلمى : “السر.. إني افتكرت لما كان أبويا بيقعد معايا بالليل في
البلكونة أغني له “حببتي من ضفايرها طل القمر” وهو يقرأ لي شعرًا من ديوان
محمود درويش: “لماذا تركت الحصان وحيدًا” ودايمًا كانت تشغلني جملة في
القصيدة دي عرفت معناها دلوقتي “مثلما كنت تحملني يا أبي”.
وختمت “ببساطة .. السر ..انك تعرف تشوف “المنحة” المستخبية في قلب
“المحنة”،أحمدك يا ربي يا حبيبي يا سندي وأشكر كل حد وقف معايا ورد غيبتي
ودعالي وساندني”.
ليست هناك تعليقات:
إرسال تعليق